Arotakenga Pukapuka: Ngā manu o te wao

---

He arotakenga pukapuka hou nā Mikaere Flavell ēnei! I pānuitia ngā pukapuka e Mikaere rāua ko tāna irāmutu, ā, i tuhituhi ia i ētahi whakaaro mō The Sapling. Heoi anō, kia reri tātou mō ngā kōrero mō Pīpī Kiwi, Flit te tīrairaka rātou ko te whānau Kauri!

We will publish the reo Pākehā/English translation of these reviews tomorrow.

Pīpī Kiwi, nā Helen Taylor, nā Hēni Jacob i whakamāori (Puffin)

Nō te ohonga ake o Kiwi Iti, ka tūmeke ia i tāna kite i tētehi hua kiwi i te kōhanga, inā hoki rā, kāore anō a Kiwi Iti kia kite i tētehi hua kiwi. Ka whakamōhiotia a Kiwi Iti e tōna matua, e Kiwi Nui, mō te pīpī Kiwi kei roto i te hua.

Kotahi anahe tā Kiwi Nui whakautu ki tēnā, ki tēnā o ā Kiwi Iti pātai e whia nei, ko tāna.

‘E kāo, Kiwi Iti, tāria te wā’.

E hīkaikai haere ana a Kiwi Iti, kei te pau haere tana manawanui i te tatari, i te tiaki, i te whanga. Me mātua mārama ki a Kiwi Iti, hei āpōpō kē atu, hei tōna anō wā e tupu kaha haere ai, ka tareka ai e Pīpī Kiwi ngā mahi te mahi e pātaingia ana e Kiwi Iti.

Nōku e pangore tonu ana i rite pū rā au ki a Kiwi Iti te kaikaha me te pākiki, nō Kiwi Iti kē ia te māngari i whākāngia ia me āna urupounamu, mōku nei ia, kīhai au i whērāhia i ngērā wā ōku i karawhiua ai au ki te kīanga ‘tamaiti mahira’, ‘tamaiti kōkō tātākī’

He māmā, he tau hoki ngā whakamāoritanga o te puka (pukapuka) nei. I whakamīharo rā au i te āhua o te whakamahia, o te whakatakotoria o ngā kupu whēnei i te ‘tiaki’, i te ‘tatari’ me te ‘whanga’ e te kaiwhakamāori, e Hēni. Hakoa he ōrite ō rātou nā tikanga, ko te wairua kē ia o tēnā, o tēnā he paku rerekē hei tāku, me te mea nei kua kaha kē atu te hīkaikai, nā te āhua o tō Kiwi Iti mata e whakaaro whēnei nei au.

I kai katoa ngōku whatu i te puka nei, me whakamihi ngā whakamāoritanga, anō te mārama, anō te tau o te reo me te taiea hoki o ngā whakaahua. Whaihoki, hāunga rā ō te puka tuhituhinga me ōna kōrerorero, kua whakaakona mai e tēnei puka tonu nei, he kōrerorero hoki ō te puka whakaahua. He tuatahitanga tēnei kua pānuitia, kua arotakengia e au he puka nā Helen Taylor me taku hiamo ki te pānui i ngētehi anō puka nāna hei raurangi rā anō. Me whakamihi rāua tahi ko Hēni Jacob, tēnā kōrua.

Ko Flit te Tīrairaka – Te Rerenga i Hē, nā Kat Merewether, nā Ngaere Roberts i whakamāori (Scholastic)

Me e hia pānui ana koe i tētehi puka e whakatinana ana i te kōrero ‘kei mate tarakihi’ pānuihia te puka Flit te Tīrairaka – Te rerenga i hē. E whakamiha ana au i te puka nei, e whakamiha kē atu ana au i te mātātoa me te para hoki o Flit te tīrairaka.

Kua raru a Flit. Ka āwhinatia a Flit e Kīkī, he pīpī Kākā.

‘E aha ana koe, Flit?’ tā Kīkī.

‘Kāore e taea e au te hoki ki tōku kōhanga’ tā Flit.

Ka tuarātia nuitia a Flit e te mahi a te manu. Hakoa rā ngā rautaki āwhina nā tēnā, nā tēnā o rātou, o ngā manu hei whakahoki i a Flit ki te kōhanga, auare ake te whai hua.

E mataaho ana te kitea o te whakawhanaungatanga me te mahinga tahitanga, hei tāku koirā tētehi o ngā kaupapa matua o te puka nei.

Tērā ngētehi hapa i kitea i te puka nei.

Kāore i tuhia tikahia te ingoa o Flit i te whārangi 23, ka mutu i tūpono atu te titiro ki ngētehi hapa wetereo. Wheoi anō rā, i rawe tonu ki a au te puka nei, kātuarehe hoki te pai o te kitea o te whakaurunga o ngētehi kupu nō mita kē, āwhai nō te tai rāwhiti. Kia pai mai hoki.

Te Whānau Kauri, nā Suzy Cato rāua ko Arthur Baysting i tuhi, nā Craig Fletcher ngā pikitia i tā, nā Ngaere Roberts i whakamāori (Scholastic NZ)

Tū rīrā i te wao he Kauri, e manaakihia ana e tōna iwi. Kiwi, Wētā, Tuna, Ruru, Pōpokorua, Pūrerehua, Tīrairaka, Tuatara hoki, Tūī, Matariki, he pākanga katoa rātou nō te whānau kauri. Ka whakarāwaitia a Kauri, ka whakapūāhuru i te noho, ka whakangahautia a Kauri e tēnā, e tēnā o tōna momo.

Kei roto i te awa, kei raro i ngā rau, kei runga i te kiri o te rākau (Kauri), kei runga i ngā peka, kei runga riro rā, ka kitea he uri o te whānau rangatira (te whānau kauri).

I rawe katoa ki a māua ko tāku irāmutu tēnei pukapuka. I āhua tākaro nei te karawhiu i a māua e whakapae ana i te momo uri nō te whānau kauri i te kōrerohia, nā te whakamahia o ngā ‘tīwhiri’, tā tāku irāmutu kupu, i roto i te pukapuka i taea ai taua mahi rā.

‘He ika roa, he tūpuhi,

kōiri haere ai.

Ika hāwaniwani…’

I ākona ngētehi kupu hou e tāku irāmutu. I manana ngā pewa, i huatakataka te pane i te kutekute nā ngaua kupu hou i ākona, hakoa he ōrite te tikanga o aua kupu hou ki ngētehi kupu taurite e mōhio kē ana ia, ko te tuhituhinga kētanga ia te mate. Ko tāku atu ki a ia ‘He wā tōna ka tūpono atu ngā whatu ki ngētehi kupu e ōrite nei te tikanga, e rerekē nei ia te tuhinga.’

Hei whakakapi ake. Me whakamihi hoki ki te reo poroporoaki te maire tūwao, te puhikaioreore o te Kauri mōna tēnei pukapuka, arā, mō Arthur. Haere atu rā me ngēnei mihi whakaaroha ā tātou.